2011 çулхи кăрлач уйăхĕн 14-мĕшĕнче «Паянхи чĕлхе пĕлĕвĕн кăткăс ыйтăвĕсем» ăслăлăхпа ĕçлĕх конференцийĕ иртрĕ

2011 çулхи кăрлач уйăхĕн 14-мĕшĕнче чăваш чĕлхи тĕпчевçи, журналист, патшалăх служащийĕ, парти ĕçченĕ В.П. Семенов çуралнăранпа 85 çул çитнине халалланă «Паянхи чĕлхе пĕлĕвĕн кăткăс ыйтăвĕсем» ăслăлăхпа ĕçлĕх конференцийĕ пулчĕ. Ăслăлăх мероприятийĕ Елчĕк районĕнчи Кивĕ Эйпеç ялĕн вăтам шкулĕнче иртрĕ. Конференци ĕçне Елчĕк район администрацийĕ пуçлăхĕн пĕрремĕш çумĕ – вĕрентÿпе çамрăксен политики пайĕн пуçлăхĕ Л.В. Левий, Аслă Пăла Тимеш ял тăрăхĕн пуçлăхĕ В.М. Рыбкин, пичет ĕçĕн ветеранĕ И.П. Иноходов, Кивĕ Эйпеçри пĕтĕмĕшле пĕлÿ паракан тĕп шкулăн директорĕ А.Н. Чермаков, директор çумĕ Р.А. Федорова, Аслă Елчĕк шкулĕн директорĕ Н.Ф. Малышкин, «Елчĕк Ен» район хаçачĕн корреспонденчĕ В.А. Кириллова тата Чăваш Республикин тĕп хулинчи Чăваш патшалăх гуманитари ăслăлăхĕсен институтĕнчен килнĕ ушкăн – директор çумĕ Э.К. Бахмисов, чĕлхе пĕлĕвĕ пайĕн пуçлăхĕ Н.И. Егоров профессор, чĕлхĕ пĕлĕвĕ пайĕн ăслăлăх аслă ĕçтешĕ А.В. Кузнецов – хутшăнчĕç. Конференци ĕçне Аслă Елчĕк шкулĕн директорĕ Н.Ф. Малышкин ертсе пычĕ.
Конференцине хутшăнакансем пуçтарăннисене В.П. Семенов пурнăçĕпе тата ĕçĕ-хĕлĕпе, Эйпеç тата ун таврашĕнчи ялсен кĕске историйĕпе паллаштарчĕç. Чăваш патшалăх гуманитари ăслăлăхĕсен институтĕнче ĕçлекен Э.К. Бахмисов, Н.И. Егоров тата А.В. Кузнецов хăйсем вăй хуракан институт ĕçĕ-хĕлĕпе кĕскен паллаштарчĕç, Кивĕ Эйпеç шкулне малашне те аталанса, çитĕнÿсем туса пыма сунчĕç, В.П. Семенов пек пултаруллă çамрăксене вĕрентсе кăларассине шаннине пĕлтерчĕç, вăтам шкул библиотекине Чăваш патшалăх гуманитари ăслăлăхĕсен институчĕ кăларнă кĕнекесем парнелерĕç.