2012 çулхи çу уйăхĕн 25-мĕшĕнче Пушкăрт Республикинчи Çтерлĕ хулинче Пĕтĕм Раççĕйри ăслăлăхпа ĕçлĕх конференцийĕ иртрĕ

2012 çулхи çу уйăхĕн 25-мĕшĕнче Пушкăрт Республикинчи Зайнаб Биишева ячĕллĕ Çтерлĕ патшалăх педагогика академийĕнче чикĕ леш енчи тата Раççей тĕрлĕ кĕтесĕсенчи ăсчахсемпе вĕрентÿçĕсем, студентсемпе тавра пĕлÿçĕсем хутшăнакан Пĕтĕм Раççĕйри ăслăлăхпа ĕçлĕх конференцийĕ иртрĕ. Ăна тутар литературин классикĕ, обществăпа политика деятелĕ Галимджан Ибрагимов çуралнăранпа 125 çул, чăваш халах поэчĕ Петĕр Хусанкай çуралнăранпа 105 çул, тутар тата чăваш филологи кафедри йĕркеленнĕренпе 15 çул çитнине халалланă.
Пушкăртри чăвашсемпе тутарсене уявпа саламлама Чăваш Республикинчи ăслăлăх тата вĕренÿ учрежденийĕсен ĕçченĕсенчен тата массăллă информаци хатĕрĕсенче вăй хуракансенчен таракан ушкăн хутшăнчĕ. Чăваш патшалăх гуманитари ăслăлăхĕсен институчĕн директорĕ Ю.Н.Исаев тăрăшнипе Чăваш Республикин вĕренÿпе çамрăксен политики министерстви Шупашкар делегацине автобуспа тивĕçтернĕ.
Чăваш делегацийĕ йышĕнче филологи ăслăлăхĕсен тăватă тухтарĕ - ЧПГĂИ чĕлхе пĕлĕвĕ пайĕн пуçлăхĕ Н.И. Егоров профессор, И.Н. Ульянов ячĕллĕ ЧПУ чăваш филологийĕпе культура факультечĕн деканĕ В.Г. Родионов профессор, М.Р. Федотов ячĕллĕ чăваш чĕлхе пĕлĕвĕпе тухăç ăслайĕсен кафедрин профессорĕ Г.Н. Семенова, культурологипе культура коммуникацийĕн кафедрин профессорĕ Г.А. Ермакова - пулчĕ. Унсăр пуçне филологи ăслăлăхĕсен икĕ кандидачĕ - ЧПГĂИ чĕлхе пĕлĕвĕ пайĕн ăслăлăх аслă ĕçтешĕ А.В. Кузнецов тата И.Н. Ульянов ячĕллĕ ЧПУ Патăрьел филиалĕн доценчĕ А.В. Волкова - хутшăнчĕ.
Конференци ĕçĕ-хĕлĕ пирки Чăваш тĕнчине пĕлтерме, кашни чăваш патнех çитерме массăллă информаци хатĕрĕсен хастар ĕçченĕсем - Чăваш наци радиовĕн редакторĕ Р.Т. Деменцова, «Россия» РПТРК «Чăваш Ен» ПТРК корреспонденчĕ И.В. Николаева,«Россия» РПТРК «Чăваш Ен» ПТРК операторĕ А.Г.Яковлев, республикăри эрнесерен тухакан «Çамрăксен хаçачĕн» корреспонденчĕ О.Ю. Калитова - инçе çула тухрĕç.
Шупашкарти сывлăх тĕлĕшпе йывăрлăхсем пуррипе ыттисемпе пĕрле вĕренеймен ачасем валли уçнă ятарлă шкул водителĕ Козьмодемьянский Валерий Николаевич икĕ пин çухрăма кĕскетсе асăннă пысăк ушкăна тĕрĕс-тĕкел çавăрса килчĕ.
Чăваш Ен делегацийĕ йăхташĕсем патне пушă алпа кайман: Чăваш Республикин вĕренÿпе çамрăксен политики министрĕ В.Н. Иванов пушкăртри чăвашсемпе тутарсем наци компонентне вĕренÿ ĕçне ăнăçлă явăçтарнине пысăка хурса хакласа Пушкăрт Республикинчи Зайнаб Биишева ячĕллĕ Çтерлĕ патшалăх педагогика академийĕн ректорне Ильгиз Раянович Кызыргулова Тав хучĕпе, Пушкăрт Республикинчи Зайнаб Биишева ячĕллĕ Çтерлĕ патшалăх педагогика академийĕн тутар тата чăваш филологийĕ кафедрин пуçлăхне Илшат Сахиятуллович Насипова Хисеп грамотипе чысланă. 15 çулне паллă тăвакан кафедрăра вăй хуракан, чăваш чĕлхине, литературине тата культурине вĕрентекен Лариса Валерьевна Власовăна, Лира Аркадьевна Васильевнăна, Наталья Степановна Карповăна тата Илшат Сахиятуллович Насипова Чăваш патшалăх гуманитари ăслăлăхĕсен институчĕн директорĕ Ю.Н.Исаев хушăвĕпе Тав хучĕсемпе хавхалантарнă.
Шупашкарти хăнасем инçетри тăванĕсене чăвашла вĕренме, чăваш чĕлхипе, этеплĕхĕпе, кун-çулĕпе, сăмахлахĕпе паллаштаракан вуншар кĕнеке парнелерĕç. Инçетри ытти хăнасем те парнесемсĕр килмен: Турккă, Казахстан, Хусан тата Ĕпхÿ делегацийĕсем академи вĕрентекенĕсене энциклопедисем, словарьсем, сумлă монографисем, вĕренÿ кĕнекисем т.ыт. парнесем парса чысларĕç.
Пухăннă ăсчахсем конференцин пленарлă тата секцисен ларăвĕсенче чăваш, тутар, пушкăрт, казах т.ыт. чĕлхесен умне тухса тăнă йывăрлăхсем пирки, вĕренекен ачасен шучĕ чакса пыни, тăван чĕлхене çамрăксем вĕренесшĕн марри çинчен пăшăрханса калаçрĕç. Пĕрле пухăнса канашласан, вăйсене пĕрлештерсен тин йывăрлăха çĕнтерме май пур тесе пĕтĕмлетÿ турĕç.