Геннадий Яковлевич Хлебников профессор пирĕнтен яланлăхах уйрăлса кайрĕ
2014 çулхи юпа уйăхĕн 11-мĕшĕнче чăваш литература пĕлĕвĕн паллă тĕпчевçи, филологи ăслăлăхĕсен кандидачĕ, профессорĕ Геннадий Яковлевич Хлебников пирĕнтен яланлăхах уйрăлса кайрĕ.
Геннадий Яковлевич 1932 çулхи авăн уйăхĕн 17-мĕшĕнче Сĕнтĕрвăрри районне кĕрекен Шанарпуç ялĕнче çуралнă. 1949-1954 çулсенче Хусан патшалăх университетĕнче вĕреннĕ, 1954-1958 çулсенче – Вăрнар районĕнчи Уравăш шкулĕнче вырăс тата чăваш чĕлхине вĕрентнĕ. 1958 çулта Мускав патшалăх университечĕн аспирантурине вĕренме кĕнĕ, 1963 çулта диссертаци ăнăçлă хÿтĕлесе филологи ăслăлăхĕсен кандидачĕ пулса тăнă. 1962-1969 çулсенче гуманитари ăслăлăхĕсен институчĕн литературăпа фольклор пайĕнче ăслăлăх ĕçтешĕ тата пай пуçлăхĕ пулса ĕçленĕ. 1969 çултанпа мĕн тивĕçлĕ канăва тухиччен Чăваш патшалăх университечĕн чăваш филологийĕпе культура факультетĕнче вăй хунă. Чăваш литературин историне, чăваш романĕн аталану çул-йĕрне тĕпчесе çырнă нумай ăслăлăх ĕçĕн авторĕ.
Чăваш патшалăх гуманитари ăслăлăхĕсен институчĕн ĕçченĕсем Геннадий Яковлевич Хлебников вилнĕ пирки унăн çемйипе, çывăх çыннисемпе пĕрле хурланнине пĕлтереççĕ.
Сыв пуллашу юпа уйăхĕн 14-мĕшĕнче 10.00 сехетре çак адреспа иртет: Шупашкар хули, Элкер урамĕ, 16 çурт, 157 хваттер.
Вернуться назад