Элле Кузьма Васильевич (1896-1974) çуралнăранпа 120 çул çитнине халалланă ăслăлăхпа практика конференцийĕ ĕçлерĕ
Юпа уйăхĕн 20-мĕшĕнче Чăваш Республикин Вăрмар районĕнчи Шăхаль ялĕнче паллă пулăм пулса иртрĕ – Шăхальте кун çути курнă чăвашсен паллă историкĕ, этнографĕ, педагогĕ тата фольклорисчĕ, истори наукисен кандидачĕ Элле Кузьма Васильевич (1896-1974) çуралнăранпа 120 çул çитнине халалланă ăслăлăхпа практика конференцийĕ ĕçлерĕ. Йĕркелекенĕсем – Чăваш патшалăх гуманитари ăслăлăхĕсен институчĕ, Чăваш халăх ăс-хакăлĕпе ÿнер академийĕ, Вăрмар район администрацийĕ тата Шăхаль ял тăрăхĕпе вырăнти шкул ертÿçисем. Шупашкартан килсе çитнĕ сумлă делегацине – вĕсен йышĕнче халăх академийĕн президенчĕ Е.Е. Ерагин тата президиум пайташĕ С.Г. Отрыванов, гуманитари институчĕн ĕçтешĕсем Е.П. Михайловпа В.А. Ендеров, К.В. Эллен кун-çулĕпе пултарулăхне 30 çул хушши тĕпченĕ А.М. Симулин историк, А.Ф. Иванов, Э.М. Сергеев, Э.И. Патмар, Н.А. Фомиряков, В.Д. Николаев, С.С. Соколов ăсчах-фольклорçă-таврапĕлÿçĕсем, Сера Петти сăвăç, Кузьма Васильевичăн пиччĕшĕн Александрăн мăнукĕ Г.С. Клементьева − палăртнă вăхăтра ял кăлави А.А. Семенов, шкул директорĕ А.А. Мирошкина, химипе биологи учителĕ В.В. Иванова тата ыттисем кĕтсе илчĕç. Мероприятие çавăн пекех Вăрмарти ентешĕсем – республикипех паллă журналист А.И. Хованский, вĕрентÿ ĕçĕн ветеранĕ Я.Н. Зайцев, Вăрмар район библиотекин краеведени пай ĕçтешĕ Р.А. Иванова, хастар таврапĕлÿçĕсемпе К.В. Эллен тăван-хурăнташĕсем тата ял çыннисем хутшăнчĕç. Конференцие килнисем чи малтанах Шăхаль ялĕпе тата унăн сăваплă вырăнĕсемпе, шкулĕпе паллашрĕç, кайран Эллен пултарулăхĕпе тата кун-çулĕпе çыхăннă вун-вун ыйтăва сÿтсе яврĕç, тухса калаçрĕç. Шкул ачисем пухăннисене хăйсен юрри-ташшипе савăнтарчĕç. 
Вернуться назад