Чăваш Республикин Наци библиотекинче Петĕр Хусанкайăн çавра çулне халалланă «Манăн çăлтăр тÿпере…» çавра сĕтел иртрĕ
Кăрлачăн 22-мӗшӗнче чăваш халăх поэчӗ Петĕр Хусанкай çуралнăранпа 110 çул çитрĕ. Çак паллă пулăма халалласа чăваш тĕнчинче тĕрлĕ тĕл пулусемпе куравсем, литература каçĕсемпе çавра сĕтелсем иртеççĕ. Поэт çуралнă кун тăван тăрăхĕнче, Тутарстанри Элкел районӗнчи Сиктӗрме ялĕнче пысăк уяв иртнĕ. Унта Чăваш Республикинчи тата Тутарстанри çыравçăсемпе общество ӗçченӗсем хутшăннă. Çавăн пекех кăрлачăн 25-мĕшĕнче Чăваш Республикин Наци библиотекинче Петĕр Хусанкайăн çавра çулне халалланă «Манăн çăлтăр тÿпере…» çавра сĕтел иртрĕ. Поэтăмăра аса илме, унăн пултарулăхне хак пама пĕр сĕтел хушшинче паллă чăваш тĕпчевçисем, çыравçисем, культура ĕçченĕсем, тăван литературăпа интересленекенсем пухăнчĕç. Калаçăва институтăн литература пĕлĕвĕпе фольклористика пайĕн ĕçтешĕсем те хутшăнчĕç. Чăваш сăмахлăхӗ çине Хусанкай çырнисем халӗ те витӗм кӳреççӗ. Çакна эпир чăваш литераторӗсен пултарулăхӗнче асăрхасах тăратпăр. Хусанкай теми аслă поэтăн сăнарне е биографине халалланă сăвăсенче те, хăш-пӗр вăрттăн йӗркесенче те, интонацисенче те, ытарлă çаврăмсенче те палăрать. Тӗпрен илсен, Хусанкай – чăваш наци ăнланулăхӗн уйрăм тапхăрӗ теме пулать. Поэт сăнарӗ чăваш халăхӗн ăс-хакăл пуянлăхӗн уйрăлми пайӗ пулнине паянхи кун та туллин йышăнни, ăнланни савăнтарать.
Сăн ÿкерчĕксене çакăнтан илнĕ: Фотогалерея - 25.01. Круглый стол «Манӑн ҫӑлтӑр тӳпере…» (Пусть горит моя звезда) посвящённый 110-летию со дня рождения народного поэта Чувашской АССР Педера Хузангая
Вернуться назад