Пуш уйăхĕн 30-мĕшĕнче Чăваш Республикин вĕренÿпе çамрăксен политикин министрĕ В.Н. Иванов Чăваш патшалăх гуманитари ăслăлăхĕсен институчĕн ĕçченĕсемпе тĕл-пулу ирттерчĕ. Владимир Николаевич ăсчахсен ĕçĕ-хĕлĕпе, халĕ пурнăçлакан тата малашне пурнăçа кĕртме палăртнă пĕлтерĕшлĕ ĕçсемпе кăсăкланчĕ, тĕпчевçĕсене кăсăклантаракан, хумхантаракан ыйтусемпе паллашрĕ. Министр институтра вăй хуракан ĕçтешĕсене май килнĕ таран пулăшса, хавхалантарса пыма хатĕр пулнине пĕлтерчĕ, çав вăхăтрах тĕрлĕ шайри грантсемпе проектсене пурнăçлас ĕçе хастартарах хутшăнмаллине палăртрĕ. Чăваш Республикинчи гуманитари ăслăлăхĕсен тĕпчевĕсене йĕркелесе пыма тивĕçлĕ институт ку таранччен паха та пысăк пĕлтерĕшлĕ тĕпчевсем ирттерсе, вĕсене халăх патне сумлă кĕнекесем пек çитерсе чăнласах пуриншĕн те тĕслĕх вырăнĕнче пулнине палăртрĕ. Тĕл пулăва хутшăнакансен республикăмăрăн вĕренÿпе çамрăксен политикин министрне ыйтусем пама, çийĕнчех хурав илме май пулчĕ. Нумай ыйту çине Владимир Николаевич тÿрех хурав пачĕ, хăш-пĕр кăткăс ыйтусем пирки малашне тĕл пулса калаçма шантарчĕ.