2012 çулхи çĕртме уйăхĕн 27-мĕшĕнче чăваш чĕлхин синтаксисне, морфологине, сăмах пулăвне, орфографипе пунктуацине тĕпчесе 200 ытла ĕç çырса пичетленĕ, орфографи правилисене хатĕрлес ĕçе тата Чăваш Республикин «Чĕлхесем çинчен» калакан саккуне хатĕрлес ĕçе хутшăннă Иван Андреевич Андреев кил-йышĕ мухтавлă профессорăмăр ĕмĕр тăршшĕпе пухса пынă ăслăлăх библиотекине Чăваш патшалăх гуманитари ăслăлăхĕсен институтне парнелерĕ. Унта тĕрĕк, славян, финн-угр, монгол т.ыт. нумай йышри чĕлхесене тĕпчесе çырнă академилле тата вĕренÿ кĕнекисем, сăмах кĕнекисем т.ыт.те йышлă.
Чăваш патшалăх гуманитари ăслăлăхĕсен институчĕн директорĕ Ю.Н. Исаев çак пуянлăха институтăн Ăслăлах библиотекинче ятарлă фондра - И.А. Андреев профессор фондĕнче - упрасси пирки пĕлтерчĕ. Юрий Николаевич хисеплĕ тĕпчевçĕн, вĕрентÿçĕн мăшăрне, институт библиотекин пуçлăхĕнче хĕрĕх çул ытла ĕçленĕ Евгения Яковлевнăна, ачисене, кĕрÿшне, пĕтĕм тăванне нимĕнле укçапа виçме çук хаклă парнешĕн тав турĕ, «Хисеплĕ профессăрăн пархатарлă ĕçĕ нихăçан çухалмĕ, сая каймĕ», - терĕ.